करदे दिल ते दूर कतई जो गलत विचार तेरा से || बे धड़के ते ऊपर आज्या यो घर बार तेरा से

मिश्राणी सुदामा से कहती है 

करदे दिल ते दूर कतई जो गलत विचार तेरा से 

बे धड़के ते ऊपर आज्या यो घर बार तेरा से ...............। 

नंगी काया कुकर आया न्यू पति में ते डरगी

परेम के आंसू झलक उठे आँख नीर ते भरगी 

भगत बिहारी गिरधारी की मेहर म्हारे पे फिरगी 

प्राण पति का कारन आरता एक दम तले उतरगी 

या ते मेरे पक्की जरगी वो सच्चा यार तेरा से ...................। 

वे अंतर्यामी सबके स्वामी सबके मन की जाणे

पर अंतर्यामी पुरुष बिना कोण उसकी गति पिछाणे

कई बार नाट्या फेर भी मने तू भेज दिया धींगताणे

क्यूकर भाग जगता जे तू नहीं जाण की ठाणे

कोन्या गया बिराणे पिया , ना गलत व्यहवार तेरा से ..................। 

भगत समझ के कृष्ण जी ने कर दिया तेरा भला से 

किसे जन्म के कर्म करे का आज यो फल मिला से 

हिरे पन्ने लाल जड़े कोई राजा किसा किला से 

महल की जड़ में ठन्डे जल का सुन्दर बना तला से 

वो नए किस्म का बाग खिला से वो खुद भरतार तेरा से .................। 

जगन्नाथ कहे भागता के म्हा जो कोए कष्ट सहेगा 

होज्या बेडा पार जो हरदम कृष्ण कृष्ण रटेगा

सत माया का बना चीणा  कोन्या किला ढहेगा   

सच्चा आनंद भोगेगा जो धर्म के काम लहेगा

धन जोबन ना सदा रहेगा यो दिन चार तेरा से ...........................।