बालक पण का यार सुदामा न्यू गल के लाऊ सू

में के धोरे कोन्या में न जड़े पाऊ सू 

बालक पण का यार सुदामा न्यू गल के लाऊ सू .......................। 

घमंड ते वैर दिन ते यारी यही से तासीर मेरी 

शीशपाल घमंडी मार दिया तो समझे थी बीर मेरी 

खड़्या सभा में किलकि दे था जाट कहे था हीर मेरी 

एक सौ एक दिए खोट बक्स फेर ठायी शमसीर मेरी 

सारे खेल खिला जाणु कोई खेले उसे खिलाऊ सू ..........................। 

बालक पण का यार सुदामा रूकमण दिन दुखी से 

भूखे रोवे पूत पिता के क्या वो जन्म सुखी से 

महा दुखी मिश्राणी जिसकी क्यूकर झाल रुकी से  

भूख हटड़े मौत निवडे किसकी कजा लुकी से 

सर्व व्यापक में इस काया का सगातुर्भुज कहलाऊ सू .........................। 

सुणलेयार सुदामा मेरे ते तो दूर प्रे क्यों था 

बीती उसी बताई क्यों न यार ते लुकी करे क्यों था 

चूल्हे तक की दौड़ तेरी रुक्मण ते बोल डरे क्यों था 

में तेरा भाई या तेरी भाभी झूठे फंड करे क्यों था 

चाल बैठिये गद्दी पे में रुक्मण ने समझाऊ सू ..............................। 

यो पोता उस भृगु का जिसने मरी लात मेरे 

मेरे लगी तू रोइ थी दर्द होया घणा गात मेरे 

तने दिया श्राप लक्ष्मी न भृगु के वास करे 

मांगे राम हरी की लीला कोई करे और कोई मरे 

भृगु करग्या मरे सुदामा में न्याय करना चाहु सू ..............................।